Jæja gott fólk...nú var ég aðeins að fara yfir heimasíðuna hennar Sólrúnar Brynju og sá auðvitað hvað ég hef verið dugleg að skrifa í vefdagbók heheh. Ég nenni nú kannski ekki alveg að skrifa fyrir síðustu tvö ár en nú ætla ég að fara að REYNA að skrifa reglulega hérna inn

Nú er skvísan að verða 3ja ára gömul eftir tvær vikur og endalaust margt hefur gerst hjá henni. Hún er alltaf í leikskólanum sínum Gimli og eftir sumarfrí fer hún yfir á "stóru" deildina þar. Hún veit ekkert betra en að vakna á morgnana og fara að hitta vini og vinkonur á leikskólanum. Ég er svakalega heppin með hvað hún er hraust stelpa því það er hægt að telja á fingrum annarrar handar hversu oft hún hefur orðið lasin síðan hún byrjaði á leikskóla.

Hún er búin að fara á tvö námskeið í íþróttum í Stubbaakademíunni og hefur staðið sig með prýði þar, ég fór með hana til læknis um daginn vegna þess að hún er svo svakalega stíf og hoppar mjög lítið miðað við hvað börn á hennar aldri eiga að geta. Ástæðan kom í ljós hjá lækninum og hún er sú að hún er OF liðug, s.s. öll liðbönd í fótum hennar eru svo slök að hún gerir sig stífa þegar hún hoppar vegna þess að annars finnur hún fyrir jafnvægisleysi og öryggisleysi. Það er lítið hægt að gera í þessu nema bara passa uppá skófatnað sem hún er í og vera dugleg að láta hana labba á ójöfnu, til þess að styrkja hana. Læknirinn sagði mér líka að það þyrfti að láta HNE lækni kíkja á kirtlana hennar því hún er með svo stóra kirtla....(hún vaknar upp við hroturnar í sjálfri sér, einsog mamman gerði hér í den)

Sólrún Brynja er algjör útibarn og það er erfitt að reyna að fá hana inn á kvöldin þegar hún á að fara að sofa.....hún vill bara vera úti úti úti og ekkert múður með það, ég er rosalega ánægð með það þrátt fyrir að þurfa að hafa fyrir því að koma henni inn, sérstaklega núna þegar það er orðið bjart allan sólarhringinn og hún tilkynnir mömmu sinni að það sé sko ekki komin nótt.

Hún elskar að syngja og syngur allan daginn,frá því hún vaknar og þar til hún sofnar á kvöldin, uppáhaldslögin hennar þessa dagana eru Mamma Mia með Abba, þú komst við hjartað mitt með Hjaltalín og Bahama með veðurguðunum:)....já mín er ekkert endilega að syngja leikskólalög Þegar hún byrjaði að tala þá sko byrjaði hún að tala og stoppar varla, hún er rosalega skýr í tali og óvitlaus....hún á það jafnvel til að leiðrétta fullorðna fólkið ef það talar vitlaust

Sólrún og Kristófer frændi hennar eru alltaf jafn miklir vinir, eða meira einsog systkin, elska hvort annað útaf lífinu en geta líka rifist einsog hundur og köttur. Það er gaman að sjá hvað þau halda mikið uppá hvort annað, ef þau hittast ekki í einhvern tíma þá hlaupa þau á móti hvort öðru og faðmast og knúsast. Nú svo á hún líka rosalega góðan vin sem býr við hliðina á okkur, hann heitir Albert og þau eiga rosalega vel saman. Þau leika sér saman úti frá morgni til kvölds, svo koma bara tár hjá þeim þegar á að fara inn að sofa. Eins ef annað þeirra er ekki heima þá verður hitt mjög sárt yfir því að geta ekki leikið

Litla stelpan mín með stóra skapið sitt en að ná tökum á skapi sínu og er með eindæmum kurteis og góð. Mamma mín, afi minn, takk fyrir, nei takk, já takk, takk fyrir mig og allt þetta er svo ríkt í henni og mér finnst það alveg yndislegt hvað hún er dugleg að þakka fyrir sig og vera kurteis.

Nú fer að líða að 3ja ára afmælinu hennar og hún er sko alveg búin að sjá til þess að mamma gamla gleymi því ekki, hún er búin að tala um það síðustu 6 mánuði og er með veisluna á hreinu, hvernig köku hún vill og hverjir eigi að koma í afmælið sitt. Það verður kátt á hjalla hér þann 6.júní þegar afmælið verður haldið, og miðað við hvað hún vill fá marga í veisluna þá þyrfti ég að leigja stóran sal hehehe.

Jæja ég ætla ekki að hafa þetta lengra í bili en lofa að vera duglegri að skrifa hérna héðan í frá.